|| మ ర ణే చ్చ ||
సి.వి.సురేష్
ఇక్కడ అంతా
అనుకొన్నది అనుకోన్నట్లే జరిగిపోతుంది
.....
పీల్చే గాలులు
రెండుగానో మూడు గానో..
నిలువునా చీలిపోతాయ్
చీకటిలో తెగిపడిన మనసులు
చస్తూకూడా మరణసుఖాన్ని పొందలేన౦తగా.....!
....
అమాంతంగా వ్యాప్తమయ్యే
బిందువు లేని వృత్తమొకటి
మతాల మూలుగులను
కలిపి కుట్టేయలన్న ఆలోచన తో సాగుతుంది..
సిరదమనుల్లో పవిత్ర జలాలు
శుద్ది చేయబడుతుంటాయి
.....
సూది దూరనంత బెజ్జం లో
అసత్య అర్ధరహిత కుటిలత్వమేదో మతం ముసుగులో
ఆసిడ్ వికృత మరకల్ని వదిలి వెల్తు౦ది
....
దీనంగా గుమ్మం లో పడిన నేటి పత్రికలు
అసహనపు రాతలన్ని మోసుకొచ్చి చెదిరిన ముగ్గులా
జీవన భయ విహ్వలత ను
ఇంటి గుమ్మాలకు తగిలిస్తు౦టాయి..
.....
అరణ్యాన్ని కార్చిచ్చుకు అప్పచేప్తారు
ఎముక మూలుగల్లో
ఏమేమో రగుల్చుకొంటాము
ఉన్న ఒకే ఒక్క పావుర౦
యజ్ఞోపవీతాన్ని వేసుకోవాలనుకొంటుంది
....
హృదయోర్ముఖాలు పగలగొట్టి
మరణేచ్చను
ఇప్పుడు హెరిడిటి గా అందిస్తారు..
...
అంతా..
సవ్యంగానే సాగుతుంది..అనుకొన్నది అనుకొన్నట్లే!!!
No comments:
Post a Comment