పవిత్ర మైన ఆ మూడు రోజులు...!

||పవిత్ర మైన ఆ మూడు రోజులు...!||
||The Sacred Three Days...||
..సి.వి. సురేష్

కొత్తదీకాదు ....ఆచ్చాదితమూ కాదు.
ఒకానొక నిశ్శబ్దం నుండి ‘గుట్టు’ 
ఆక్షేపిత కలాల మధ్య ధ్వనిస్తూ లిఖిస్తోంది.
సంస్కార నిషేద౦
కొన్ని గోడల మాటున....
దాచిన మూడు రోజులు బహిరంగ వేదికపై..
ఇప్పుడు నీలి రక్తాన్ని స్రవిస్తు౦ది...!
..
2
..
ఏది రహస్యం.... ?
రాతిరి చీకటి చిక్కగా కోసే చివురాకుల బాధలు
ప్రతి గుమ్మానికి బహిరంగంగా వ్రేలాడదీయండి ...
సగం తెగిన దేహాలేవో దండెం పైన
ఆరవేసే తెగువను విస్పోటపరచండి.
అవన్నీ ఇప్పుడు , అసంబద్ద కవితల
సమాహారమవ్వనూ వచ్చు.
దివ్య ద్వారాల అవని రహస్య మేధో
కవనాల అపరూప వస్తువైంది..
ఆధునిక కవితల్లో వగస్తున్న
ఆ గుట్టు baton లా అందుకొని అలరిస్తోంది...
అపరూప రహస్య౦ పేపర్లో
చుట్టుకొని వెళుతూ జియస్టి తో బహిరంగమైంది.
..
3
..
ఏది పవిత్రం ...?
నిస్సిగ్గుల చర్చలో స్రవిస్తున్న
మూడు రోజుల కష్ట౦...
పవిత్రమైన అమ్మతనానికి తొలి గుమ్మం..
కాదంటావా?